මෙවර අන්තර් පාසල් ලීග් රග්බි ශූරයින් වූ කොළඹ රාජකීය විද්‍යාලය මෙවර ජනාධිපති කුසලාන පිළිමළුන් පිටුදැකීමේ රග්බි තරගාවලියට සහභාගී නොවීමට තීරණය කර තිබේ.

අපරාජිතව ලීග් රග්බි කිරුළ දිනූ සාබිත් ෆෙරෝස්ගේ නායකත්වයෙන් යුත් රාජකීයන් අවසන් තරගයේදී බම්බලපිටිය සාන්ත පීතර කණ්ඩායම පරාජය කළේ, ලකුණු 32 ට 13 ක් ලෙසයි.

නමුත් ලබන ඉරිදා කොළඹදී ආරම්භවන ජනාධිපති කුසලාන පිළිමළුන් පිටු දැකීමේ රග්බි තරගාවලියට රාජකීය විද්‍යාලය සහභාගී නොවීමට තීරණය කර ඇත.

මාධ්‍ය කළ විමසීමකදී රාජකීය විද්‍යාලයීය රග්බි ක්‍රීඩාභාර ආචාර්යතුමා සඳහන් කළේ, තම කණ්ඩායමේ ක්‍රීඩකයින් බහුතරයක් මෙවර අ.පො.ස උසස් පෙළ විභාගයට පෙනී සිටීම හා ප්‍රබල ක්‍රීඩකයින් කිහිපදෙනෙකු අබාධ තත්ත්වයන්ට පත්වීම මෙම තීරණය ගැනීමට හේතුව වූ බවයි.

රාජකීය විද්‍යාලය මේ තරගාවලියට සහභාගී නොවීමට තීරණය කිරීම හේතුවෙන් ශ්‍රී ලංකා පාසල් රග්බි පාපන්දු සම්මේලනය විසින් වෙස්ලි විද්‍යාලයට හා සහිරා විද්‍යාලයට මෙම ජනාධිපති කුසලාන පිළිමළුන් පිටුදැකීමේ රග්බි තරගාවලිය සඳහා ඇරයුම් කර ඇත.

Sinhala Puvath is a Sinhala language news website based in Sri Lanka. Sinhala Puvath was established in 2016. The website's coverage includes politics, sports, entertainment and military.