Loading...

කණ්ඩායම් 32 ක් කාණ්ඩ 8 ක් යටතේ එකම කුසලානයක් උදෙසා තරග වැදුණු 21 වන ලෝක කුසලාන පාපන්දු තරගාවලියේ උච්චතම අවස්ථාව සනිටුහන් කරමින් අවසන් මහා තරගය මීට සුළු මොහොතකට පෙර ආරම්භ වූවා.

මීට විසි වසරකට පෙර පාපන්දු ලෝක ශූරයන් වූ ප්‍රංශය මේ මොහොතේ තරග වදින්නේ සිය පාපන්දු ඉතිහාසයේ ප්‍රථම වරට ලෝක කුසලාන පාපන්දු අවසන් තරගයට සුදුසුකම් ලැබූ ක්‍රොඒෂියාව සමඟ යි.

රුසියාවේ මොස්කව් නුවර පැවැත්වෙන මෙම අවසන් මහ තරගයට පෙර විචිත්‍රවත් සංදර්ශනයක්ද පැවැත්වුණු අතර, මෙවර පාපන්දු ලෝක කුසලාන තේමා ගීතයද එහිදී එළිදැක්වුණා.

මෙවර ශූරතාව දිනාගනු ඇතැයි බොහෝදෙනා අපේක්ෂා කළ එංගලන්තය පරදවා ක්‍රොඒෂියාව අවසන් මහා තරගයට සුදුසුකම් ලැබුවා.

1991 වසරේදී ස්වාධීන රාජ්‍යයක් ලෙස බිහිවූ හතළිස් එක්ලක්ෂ හැත්තෑදහසක ජනතාවක් වෙසෙන ක්‍රෝඒෂියාව ලෝක කුසලාන අවසන් මහා තරගයට සුදුසුකම් ලැබූ අඩුම ජනගහණයක් සහිත දෙවන රටයි.

1930 වසරේ සමාරම්භක ලෝක කුසලානය ජයග්‍රහණය කළ උරුගුවේ, එලෙස අවසන් සටනට එක්වූ අවම ජනගහණයක් සහිත රට වන අතර, එහි ජනගහණය 17 ලක්ෂයක්.

මේ අතර මෙවර ලෝක කුසලාන තරගාවලියේ තුන්වන ස්ථානය සඳහා ඊයේ පැවති තරගයේදී එංගලන්තය පරදවා ගෝල දෙකට බින්දුවක ජයක් වාර්තා කිරීමට බෙල්ජියම සමත්වුණා.

ශාන්ත පීටර්ස්බර්ග් හි පැවති එම තරගයෙන් පරාජය ලැබූ එංගලන්තයට මේ අනුව හතරවන ස්ථානය හිමිවනවා.

1966 ලෝක ශූරයන් වූ එංගලන්තය 1990 වසරේදී ද හතරවන ස්ථානය දිනාගත්තා.

Loading...