Loading...

ගාල්ල ජාත්‍යන්තර ක්‍රිකට් ක්‍රීඩාංගණයේදී වෙනදාට දක්නට ලැබෙන තණතීරුවට වඩා බෙහෙවින් වෙනස් වූ තණතීරුවක් මෙම ටෙස්ට් තරඟයට ලැබී ඇති බව ශ්‍රී ලංකා කණ්ඩායමේ දඟ පන්දු යවන ක්‍රීඩක ඩිල්රුවන් පෙරේරා පවසනවා.

තරඟයේ පළමු දිනයෙන් පසු පැවති මාධ්‍ය හමුවකට එක් වෙමින් ඩිල්රුවන් මේ බව පවසා සිටියා.

මෙම තණ තීරුව පිතිකරණයට වඩාත් සුදුසුවනු ඇති බවයි ඔහු විශ්වාසය පළකරන්නේ.

“අපි වෙනදා දකින තණතීරුව වගේ නෙමෙයි මේ තණතීරුව. මොකද අපි බලාපොරොත්තු වුණාට වැඩිය වෙනස් තණතීරුවක් තමයි ලැබිලා තියෙන්නෙ. මම හිතන්නෙ දවස් දෙකක් වැස්ස නිසා තණතීරුව වහලා තිබුන නිසා එහෙම වෙන්න ඇති. පළමු ඕවර 35න් පස්සෙ තණතීරුව ගොඩක් මන්දගාමී වුණා. අලුත් පන්දුවෙන් දඟ කැවුනට පස්සෙ දඟ කැවීමත් අඩුවුණා.”

තරගයේ ඉදිරි දිනවල දී ද තණ තීරුවෙහි වෙනසක් සිදුවෙතැයි ඔහු අපේක්ෂා කරන්නේ නැහැ.

“මම හිතන්නෙ නැහැ ඉදිරි දවස් දෙක තුනෙත් තණතීරුව ලොකු වෙනසක් වෙයි කියලා. ඒ නිසා කොහොමත් අපිටත් මේ තණතීරුව හොඳ වේවි පිතිකරණයේ යෙදෙන්න. එංගලන්ත පිතිකරුවන් මුල ඉදලම වේගයෙන් ලකුණු ගන්න බව අපි දැනගෙන තමයි හිටියේ. කාසියේ වාසිය දිනලා අපි ගැහුව්වත් ඔය දේම තමයි කරන්නෙ”

Loading...