Loading...

මගීන්ට අශෝභන ලෙස බැණ වැදුණු රියැදුරෙකුගේ දුම්රිය ධාවනය අත්හිටුවා තිබෙනවා.

දුම්රිය සාමාන්‍යාධිකාරී ඩිලන්ත ප්‍රනාන්දු සඳහන් කළේ, පරීක්ෂණ අවසන් වන තුරු මෙම පියවර ගත් බවයි.

ඊයේ පස්වරුවේ කොළඹ කොටුවේ සිට හලාවත දක්වා ගමන් කළ අංක 424 දරණ කාර්යාල දුම්රියේ මගීන් කිහිප දෙනෙකු එන්ජින් මැදිරියට නංවා ගෙන අනෙක් මගීන් ඊට ගොඩවීමට උත්සහ දැරීමේදී රියදුරු ඔවුන්ට පරුෂ වචනයෙන් බැණ වදින වීඩියෝවක් සමාජ මාධ්‍යයට එක්කර තිබුණා.

අදාළ සිද්ධිය පිළිබඳව පරීක්ෂණ ආරම්භ වී ඇත්තේ එම වීඩියෝව පදනම් කර ගනිමින්.

අංක 424 දුම්රියට පෙර, හලාවත සිට කොටුව බලා ධාවනය වීමට නියමිතව තිබූ අංක 422 දරණ දුම්රිය ඊයේ ධාවනය වී තිබුණේ නැහැ.

මේ හේතුවෙන් අංක 424 දුම්රියේ ගමන් කිරීමට ප්‍රමාණය ඉක්මවූ මගීන් පිරිසක් සිටීමත් සමග ඔවුන් එන්ජින් මැදිරියට නංවා ගත් බව මූලික පරීක්ෂණවලදී රියැදුරු ප්‍රකාශ කර ඇතැයි දුම්රිය සාමාන්‍යාධිකාරීවරයා සඳහන් කළා.

තමා බැණ වැදීමට පෙර මගියෙකු තමාට බැණ වැදුණු බවත්, එම කොටස වීඩියෝවේ නොමැති බවත් රියැදුරු ප්‍රකාශ කර තිබෙනවා.

පවතින නීතිය අනුව දුම්රිය එන්ජින් මැදිරියට රියැදුරු හැර කිසිදු බාහිර පාර්ශවයක් නංවා ගැනීම තහනම් වනවා.

කෙසේ වෙතත් සිද්ධිය සම්බන්ධයෙන් දුම්රිය ගමනා ගමන අධිකාරීවරයාගේ ප්‍රධානත්වයෙන් පූර්ණ පරීක්ෂණයක් ක්‍රියාත්මක බව දුම්රිය සාමාන්‍යාධිකාරී ඩිලන්ත ප්‍රනාන්දු වැඩිදුරටත් සඳහන් කළා.

Loading...