Loading...

මේ කියන්නට යන්නේ රටේ සිදුවන මහා පරිමාණ මුල්‍ය වංචාවක් ගැනය. මෙකී වංචාව රට හමුවේ අනාවරණය නොවුණත් තැන් තැන්වල එකක් දෙකක් මාසයට සිදුවන බව මේ ලිපිය කියවන, ඒ ගැන දැනුමක් ඇති ඕනෑම අයකු දන්නා දෙයකි. බැංකු ක්ෂේත්‍රයේ සිටිනා කිහිපදෙනකු අතින් සිදුවන මෙකී ජාවාරම අදවන තෙක් පොලීසියට පැමිණිලි නැත. එපමණක් නොව ඒ ගැන තොරතුරක්ද නැත. යම් ආකාරයකින් පොලීසියට පැමිණිල්ලක් ගියහොත් එකී පරීක්ෂණය වැඩිදුර කරගෙන යාමට කිසිදු සාක්ෂියක් ඉතිරිව ඇත්තේද නැත. එතරම් සියුම් වංචාවක් වන මෙය “නඩුත් හාමුදුරුවන්ගේ බඩුත් හාමුදුරුවන්ගේ” න්‍යායට ඇතුළත් වන්නේය.

ලෝකයේ පවත්නා ජාත්‍යන්තර වශයෙන් පිළිගන්නා බැංකු රාශියක් ඇත. එකී බැංකුවල කෝටිපතියන් ධනපතියන් සිය ගිණුම් රහසිගතව පවත්වාගෙන යන අතර ඇතැම් ගිණුම් හිමියන් මියයාමත් සහ ඇතැම් ගිණුම් අවුරුදු ගණන් අක්‍රීය වීමත් මත එම ගිණුම් “මැරුණු ගිණුම්” හෙවත් “Deth account” නමින් හැඳින්වෙයි. මෙම ගිණුම් ලෝකයේ ඇති සෑම බැංකුවකම ලක්ෂ ගණනින් පවත්නා අතර එවැනි ඇතැම් ගිණුම් වසර 10, 20 තරම් පැරුණි ඒවාය. එහෙත් එම ගිණුම් හිමියා හෝ ඊට අයිතිවාසිකම් කියන අයකු එන තෙක් අදාළ මුදල් පොලී වෙමින් සසර වසනාතුරු පවතින්නේය.

ඒ ගැන අදාළ බැංකුව කටින් කෙළ පොදක් හලන්නේ ද නැත. මෙකී ගිණුම් අවුරුදු විස්ස තිහ පැරණි වූ පසු ගිණුම් හිමියා නොපැමිණියහොත් ඔහු මරණයකට පත්ව ඇති බව අදාළ බැංකුවල ඇතැම් සේවකයන් දනිති. ඒ අනුව මිලියන ගණනින් ඩොලර් යුරෝ පිරි එම ගිණුම්වලට ප්‍රහාර එල්ල කිරීම සඳහා අදාළ බැංකුවේම නිලධාරීහු සන්නද්ධ වෙති. ඒ අනුව එම මුදල් එළියට ගැනීමට ඔවුන් මෙහෙයුමක් සිදුකරන අතර එම මෙහෙයුම සඳහා ආසියාතික රටක් හෝ යුරෝපයෙන් බැහැර රටක් යොදාගනී. විශේෂයෙන් ශ්‍රී ලංකාව, මැලේසියාව, සිංගප්පුරුව, වියට්නාමය ආදී රටවල් මෙහිදී ඉදිරියෙන්ම සිටියි.

ඉහත කී රටවල බැංකු ක්ෂේත්‍රයේ රැකියාව කරන පුද්ගලයන් හෝ නියෝජිතයන් හෝ අල්ලා ගන්නා මොවුහු මෙම ජාවාරම සිදුකිරීමට පිඹුරැපත් සකස් කරගනිති. ඒ සඳහා සෘජුව සම්බන්ධ නොවුණත් බ්‍රෝකර්වරු කිහිප දෙනෙක් හරහා අදාළ මෙහෙයුම ක්‍රියාත්මක වේ. ඒ සඳහා අවම වශයෙන් සාමාජිකයන් 10-20 ත් අතර ප්‍රමාණයක් මෙම මෙහෙයුමේ සිටිති.

ගනුදෙනුව අනුව මෙම මෙහෙයුම විදේශයේ සිට ගෙන එන පුද්ගලයාට සීයට 60-70 ක් දිය යුතුය. ඉතිරි සීයට 40-30 මෙරට මෙහෙයුම බාරගත් පුද්ගලයාට හා පිරිසට හිමිවනු ඇත. ඒ අනුව මෙම ජාවාරම සිදුකරනු ලබන්නේ මෙසේය.

මුලින්ම අදාළ මුදල මෙරටට ගෙන ඒම සඳහා විදෙස් රටවල් සමඟ ගනුදෙනු වන ගිණුමක් සොයා ගනු ලබයි. ඇතැම් විට එම මුදල් එම ගිණුමට බැරකර ගැනීමට හැකියාව ඇති අතර එය සරලම ක්‍රමය වේ. නැතහොත් මෙරට බැංකු ක්ෂේත්‍රයේ සිටින මෙම ජවාරම ගැන හසල දැනුමක් ඇති අයකුට රහස් අංකයක් ලබා දී ඒ හරහා එරට ගිණුමට ඇතුළත් වී එම මුදල් ඇද ගැනීමේ ක්‍රමයක් ද යොදාගනී. එහෙත් මේ සියල්ලට වඩා සිදුකරන්නේ මැදදී ඇදීම නැමැති ක්‍රමයයි. එනම් එකී ගිණුමට අයත් මුදල් එම ගිණුමෙන් වෙනත් ගිණුමකට හුවමාරැ කරන විට ඊට මැදිහත් වී (රහස් අංක හරහා) එම ගනුදෙනුව සිදුවන අවස්ථාවේ මුදල් ඉවතට ගැනීමය. එය කිසිදු අයකුට සැකයක් නොමැති අතර එය සාමාන්‍ය පරිදි සිදුවන ක්‍රමයක් වෙයි.

මේ ආකාරයෙන් ලබා ගන්නා මුදල් මිලියන ගණන් වන අතර දින දෙක තුනකට පසුව අදාළ ගිණුමට බැරවේ. එසේ මුදල් බැරවූ සැණින් අවස්ථා කිහිපයක් හරහා මුදල් එළියට ගනු ලබන අතර ඉන් පසුව එක් කොටසක් උණ්ඩියල් ක්‍රමය හරහා විදේශ නියෝජිතයාට යවනු ලබයි. එසේ යැවීමෙන් පසුව ඉතිරිය මෙරට නියෝජිතයන් අතර බෙදේ.

කෙසේ වෙතත් මෙලෙස මුදල් එවීමේදී එම මුදල් යූරෝවලින් සිදුකිරීම මෙරටදී සිදුකරන්නේ නැත. එයට හේතුව නම් මෙරටදී යුරෝ මුදල් මහ බැංකුවේ දැඩි පරික්ෂාවට ලක්වීම හේතුවෙනි. LTTE සංවිධානය විසින් මෙරටට යුරෝ හරහා මුදල් එවනු ලබන නිසා මෙරට මහ බැංකුව නිතර ඒ ගැන අවධානයෙන් සිටියි. මේ නිසා කිසිවකු යුරෝ හරහා ගනුදෙනු කරන්නේ නැත. ඒ සඳහා යොදා ගන්නේ ඩොලර්ය.

මේ වන විට තැන් තැන්වල ඉතා රහසිගතව සිදුකරෙන මෙම ජවාරම නිසා කෝටිපතියෝ වූවෝ සිටිති. ඔවුහු මේ හරහා කෝටි ගණනින් මුදල් ඇද ජිවිතයේ සැප විඳිති. මෙය ලෝකය පුරා ප්‍රසිද්ධ ජාවාරමක් වන අතර ලංකාව තුළ ද එය ඉතාමත් ආරක්ෂාකරී ලෙස රහසිගතව සිදුවේ. එහෙත් මේ ගැන කිසිදු පැමිණිල්ලක් නැත. ඒ නඩුත් හාමුදුරැවන්ගේ බඩුත් හාමුදුරුවන්ගේ වීම නිසා විය යුතුය.

– අසංක කළුබෝවිල

Loading...